【自由副刊】劉靜娟／【台語時間】 無喙的貓仔

◎劉靜娟

我的衫櫥內有一對Hello Kitty尫仔。十外年前我猶咧上班的時，一个同事送的。彼時陣，真濟人咧痟（siáu，瘋）這種無喙（嘴）的布貓仔；排隊排規半工，嘛無一定買會著。

收著這種禮物，我淡薄仔意外，我毋是會愛這款尫仔的大人啊。伊講，「趣味啊，你無看in遮爾（tsiah-nī，這麼）古錐。」

請繼續往下閱讀...

這个同事嘛生做古錐古錐，閣好笑神；伊個性堅強，雖然離婚，也無失志，家己一个人共（kā，把）兩个囝栽培甲真好。

我三不五時看稿、改稿頭眩目暗的時，就去伊工作的資料室掀雜誌看看咧；後來伊調去電務室，我去傳真副刊的稿予插畫家的時，也順紲和伊開講一時仔；伊的辦公室變做我「歇喘」的所在。有時陣，兩人嘛會互相參考，做幾下仔筋骨伸勻（tshun-ûn，舒展）的動作。

有一陣，伊想欲練習創作，我大力鼓勵；因為伊的人生誠精采，婚姻的故事袂輸小說。伊寫兩篇短文予我看，我講袂bái，建議伊去投「家庭生活」版。伊猶未去投，認真想好四、五个有「氣質」的筆名，來和我參詳。我講遐的攏若瓊瑤小說女主角的名；共伊講若一時無法度決定用啥名，先用本名嘛無要緊。伊講袂使，萬一出名，就無隱私權矣。伊想甲足遠，講日後若變做出名的作家，報社、雜誌社無定著會來約伊寫稿，甚至採訪，「唉呀，到時我毋知寫會出來無？」

伊的口氣若真若假、有眠夢（夢想）有煩惱的表情非常可愛；予我想著我的後生也bat（曾）有這款煩惱。伊考高中前一個月，才忽然間覺醒，開始認真讀冊。有一日，竟然共我講，「萬一若予我考著排頭前的明星學校，以後我就愛一直拍拚落去，按呢就害（糟）矣！」

我的同事操煩過頭，等到報社民營化、逐家四散去的時，伊猶無投過一篇稿，毋bat用著遐的有氣質的筆名，當然，嘛免驚人來約稿的時寫袂出來。我的後生也「好佳哉」無考著排頭前的學校，毋免一直拍拚落去。

這十外年來，和這个同事罕得見面，幾年前食伊後生的喜酒的時，伊共阮講，向望六十歲以前會拄（tú，遇見）著有緣的人；若無，就死心，獨身仔落去。伊的上帝有聽著伊的祈禱，兩年前，伊正經拄著一个和伊有仝款信仰的好對象；結婚了後兩人蹛（tuà，住）佇南部。電話中聽會出伊真幸福，阮攏替伊歡喜。

今仔日斟酌（仔細）看這對Hello Kitty，一隻穿粉紅仔色的衫，一隻穿金色的，古錐閣喜氣。想講有一日來和我這个同事講耍笑，問伊會記得當初想的筆名無？是毋是報兩个予我來號這對貓仔？●

☆藝文新聞不漏接，按讚追蹤粉絲頁。
☆更多重要藝文新聞訊息，請上自由藝文網。

不用抽 不用搶 現在用APP看新聞 保證天天中獎　 點我下載APP　 按我看活動辦法